حاضر حسيبلك روحي مفتوحة
شارع أخير مليان حاجات ياما
قِصص العرب مع بهجة الفتوحات
ورُسُل يني إسرائيل كُلُهُم
مزامير داوود..
وكتاب مقدس تاني ماقريتهوش
ابقى افتحيه بشويش وما تجرحيش الجلد من بره
وماتخطفيش ..
بسكوتة الكيمو كونو من بين إيدين عابد
أقصد الحتة الأخيرة اللي بالشوكولاته
حتلاقي واحدة ف إيد أبويا كان شايلهالي
يمكن شايلهالك
*** فيه ع الرصيف ده جرامافون مسروق
كان جايبه واحد خواجه لجدته ف جليم
معرفش ليه وازاي سرقته وخش ف ال حواديت!!
شيلي التراب ده وسمعيني……. الصمت
قلبي تعب م الدوشة والتفاصيل
……………………………
( طبيب جراح قلوب الناس اداويها )
بين “چورچ” وسيجارة الحشيش واللمة والجمهور
وآهات بيختم بيها ف المذهب ..
سيناريو مدروس من زمان
بيطبقُه على خشبة المسرح
لو تقدري تغني، غنيلي وحدي وماتسيبيش ضلك هناك
علشان ما يستسلمش للتوهان
فتخُشِّي حال مُربِك
وماتطلعيش منه
……………………………………
فيه أربعين دوري وكؤوس ياما
وصورة للأهلي
متعلقة ف برواز على حيطه ف الشارع
فيه توهه ومواجع
مع ذكريات ماتشات
سايبالي حزن عظيم
رغم الكتير م الفَرَح مش قادرة تنساني
كل الحاجات دي خديها وانتي هناك
عامليها زي التحف.. وخديها أنتيكا
وسيبيلي صورة لقلب ” ابو تريكه “
……………………………….
فيه إيه كمااان……..
واللهِ ما انا فاكرحتكملي؟
اخبار مشابهة
